Os anos 50 e as esplendorosas feiras que se celebraban nesa época en Cotobade volveron, por un día, a amenizar a vida deste municipio.
Unhas 4.000 persoas acudiron este domingo á undécima edición da Feira de Cuspedriños, un evento que serve para rememorar os potentes mercados que organizaban a mediados do século pasado.
A feira, que xa está complemente consolidada no calendario festivo pontevedrés, contou con máis de setenta postos repartidos polos pendellos, o antigo mercado, a carballeira e a contorna da capela da Virxe do Carmen.
Numerosas persoas participaron, vestidas de época, na recreación deste antigo mercado que contou ademais cunha ampla programación de actividades.
Xunto cos postos de artesanía ou alimentación, organizáronse actividades infantís, unha exposición de vehículos antigos, unha pasarela de traxes tradicionais galegos ou diferentes espectáculos teatrais e musicais.
A xornada contou con animación durante todo o día da man dos grupos Os Trazantes de Tenorio, Os de Ningures e Os Afoutes.