Unha delegación do Hospital Clínic de Barcelona desprazouse este mércores ata a cidade de Pontevedra para coñecer de primeira man o proxecto arquitectónico e asistencial do futuro hospital público Novo Montecelo.
Esta visita ás obras da fase I do centro sanitario de Mourente forma parte dun amplo calendario para percorrer distintos hospitais destacados, nacionais e internacionais, como preparación dun Máster Académico especial, dunha sola edición e sen continuidade, promovido pola Universidade de Barcelona e polo propio Hospital Clínic, que ten como obxectivo redactar as bases do futuro concurso internacional de proxectos do Novo Hospital Clínic.
O xerente da Área Sanitaria de Pontevedra e O Salnés, José Flores Arias, fixo de anfitrión na reunión técnica cos responsables do Hospital Clínic na que tamén estiveron presentes a directora asistencial pontevedresa, Susana Romero Yuste, e outros membros do equipo directivo da Área Sanitaria de Pontevedra e O Salnés.
Tras este encontro para coñecer detalles da evolución do Novo Montecelo, "que xa se converteu nun referente en canto a infraestrutura sanitaria de última xeración", a comitiva do hospital barcelonés percorreu parte das obras e tivo a oportunidade de supervisar o avance os traballos do futuro hospital, que sumará máis de 8.000 metros cadrados de superficie ao actual centro hospitalario de Mourente.
O proxecto arquitectónico hospitalario do Novo Montecelo avanza na cobertura exterior da fachada do edificio en ‘Z’ de hospitalización, de xeito simultáneo ao tabicaxe e delimitación interna de espazos dos diferentes andares, coma son os basamentos e áreas de hospitalización. A Consellería informou que "o cronograma construtivo da obra continúa a avanzar de xeito gradual e progresivo nas áreas de carga, módulos de instalacións e espazos dunha soa altura".
A visita técnica de hoxe en Montecelo é a segunda deste tipo que se recibe na Área Sanitaria de Pontevedra-O Salnés no que vai de ano 2024 por parte dunha delegación sanitaria catalana, xa que o pasado xaneiro foron responsables do Hospital La Creu e Sant Pau de Barcelona os que visitaron as obras do Novo Montecelo co obxectivo de coñecer o proxecto arquitectónico do futuro hospital público de pontevedrés e establecer sinerxías entre ambas institucións sanitarias.
XORNADA DE PORTAS ABERTAS
Por outra banda, a Área Sanitaria de Pontevedra e O Salnés tamén acolleu este mércores no salón de actos do hospital Montecelo a Xornada de portas abertas á que asistiron arredor de 75 futuros residentes de formación sanitaria especializada de Medicina, Enfermaría, Farmacia e Psicoloxía procedentes de toda España.
"Temos permanentes ganas de facer cousas. Eu fun residente aquí e, agora, son o xerente dunha área que, aínda que é pequena, ten moitas potencialidades" manifestou o xerente da Área Sanitaria, José Flores, quen lles animou a elixir Pontevedra e O Salnés para o seu período de residencia, formación que o ano pasado completou o 100% das súas prazas.
Tras o remate desta Xornada de portas abertas, os futuros residentes tiveron a oportunidade de coñecer os servizos do seu interese, guiados por representantes dos médicos en enfermeiros en formación das distintas especialidades.