O próximo sábado, 24 de xaneiro, o Centro Social do Mar de Bueu acollerá unha gala benéfica pola ELA (Esclerosis Lateral Amiotrófica).
A gala contará coas actuacións dos grupos de música tradicional bueueses Retrouso de Cela e A.C. Novos Ventos e da música de Noite Son e Adolfo FH.
A xornalista Raquel Atanes será a encargada de guiar e presentar o acto, no que haberá algunha sorpresa e sorteos grazas a doazóns de comercios locais.
O evento, previsto a partir das 18.30 horas, está organizado pola asociación Agaela e o Concello de Bueu, coa colaboración da Deputación Provincial de Pontevedra e comercios da vila.
A entrada terá un prezo de 5 euros, que se destinarán integramente a Agaela. Todas as persoas que non poidan asistir pero desexen colaborar terán a oportunidade de facelo a través da fila 0.
Para a venda de entradas e merchandising, integrantes da asociación estarán o xoves 22 de xaneiro cun posto ao lado da praza de abastos de Bueu.
Laura Ogando Muñiz, concelleira de benestar social e igualdade; Carmen García García, concelleira de cultura e mocidade; Pilar Guimeráns Gallego, secretaria da asociación AGAELA; e María Moldes Menduíña, veciña afectada, presentaron a gala este venres.
Laura Ogando destacou que o obxectivo é "dar a coñecer e visibilizar" a ELA.
Pilar Guimeráns explicou que todo o recadado irá destinado ao copago para fisioterapia, logopedia e rehabilitación das persoas afectadas, pois actualmente a lei ELA non inclúe estes gastos, motivo polo que a asociación sigue loitando.