Unha muller resultou ferida e tivo que ser evacuada ao Hospital Montecelo na mañá deste mércores despois de sufrir un accidente cando circulaba pola autoestrada AP-9 en Barro.
O accidente produciuse á altura do punto quilométrico 117 da AP-9 sobre ás oito horas da mañá deste mércores e consistiu nunha saída de vía.
Varios particulares informaron do accidente ao 112 Galicia e solicitaron axuda para unha muller que resultara ferida. Tamén a propia afectada contactou cos xestores de emerxencias para indicar que, debido ao impacto, sufrira un golpe na cabeza.
Nada máis ter constancia do suceso, desde o 112 pasouse aviso ao equipo de Urxencias Sanitarias de Galicia-061 e aos Bombeiros do Salnés.
Unha vez no lugar, os profesionais sanitarios confirmaron que unha das súas ambulancias trasladara á ferida ata o centro hospitalario.
Tamén se desprazaron ao lugar do accidente axentes da Garda Civil de Tráfico e persoal de mantemento das estradas.