Unha muller de tan só 57 anos converteuse, este luns, na vítima 92 da área sanitaria de Pontevedra e O Salnés como consecuencia do coronavirus. A particularidade deste caso é que esta paciente, que se atopaba ingresada no Hospital Montecelo, non presentaba enfermidades previas no seu historial médico antes de contaxiarse de covid-19.
Segundo os datos ofrecidos por Sanidade desde que se notifican as mortes derivadas por esta pandemia, trátase da primeira paciente que falece nesta área sen presentar patoloxías previas. É a terceira vítima en tres días que falece no Complexo Hospitalario Universitario de Pontevedra (CHUP). A anterior vítima era tamén unha muller de 78 anos que falecía en Montecelo tras presentar enfermidades previas no seu cadro clínico.
Este luns, a Consellería de Sanidade notificaba o falecemento de 24 persoas en Galicia diagnosticadas con coronavirus. Estas mortes non se producían todos nesta xornada, senón que algúns se rexistraban na semana pasada, pero que ata as últimas horas non foron validadas por Saúde Pública para confirmar que faleceran por causa da infección de covid-19.
Desta forma, segundo a Consellería os falecementos foron os seguintes:
O día 14 morría unha muller de 93 anos na residencia integrada Bo Día Sagunto de Vigo. Procedía da residencia Moledo de Vigo.
O venres 15 falecía un home de 63 anos no Hospital Vithas Fátima de Vigo; unha muller de 83 anos na residencia San Bartolomeu de Xove e un home de 88 anos no Complexo Hospitalario de Ferrol.
O sábado 16 tamén se rexistraron outras dúas vítimas: un home de 86 anos no Complexo Hospitalario da Coruña e unha muller de 94 na residencia Domus VI de Vimianzo.
O domingo 17, ás nove vítimas que foran notificadas, hai que engadir 13 persoas máis, entre as que se atopaban dous homes, de 82 e 66 anos que perdían a vida no Hospital Álvaro Cunqueiro de Vigo, un deles procedente da residencia Paz e Ben de Tui.
Este luns, ademais da paciente de Montecelo, tamén morrían outras catro persoas, sempre segundo os datos facilitados por Sanidade. Neste caso, trátase dunha muller de 92 anos no Complexo Hospitalario da Coruña; un home de 87 anos no Complexo Hospitalario de Santiago; unha muller de 84, no Complexo Hospitalario de Ferrol e un home de 81 anos na residencia Santa Teresa de Jornet da Coruña.
Todas as vítimas, agás o caso da muller de 57 anos, presentaban patoloxías previas nos seus cadros clínicos. O número de vítimas en Galicia por mor da pandemia ascende xa a 1.536 persoas.