A Plataforma pola Defensa do Centro de Saúde de Seixo e de Marín denuncia que o centro de saúde de Seixo está a operar cunha soa médica para atender a máis de 2.400 persoas
A plataforma, que agrupa a máis de 20 colectivos, sinala que esta situación se debe á baixa da outra facultativa que non foi cuberta polo Sergas desde o 1 de xuño.
O colectivo indica que, desde o momento da baixa, os casos máis urxentes, as receitas e os pacientes foron asumidos pola outra doutora, provocando que a lista de agarda e a axenda desta única médica aumente.
A portavoz da Plataforma, Iria Aboi, incide en que "a pesar dos esforzos do persoal que temos no centro de saúde por atender as necesidades, aumentou moito o tempo de espera para unha cita". Ademais, di que o verán aínda non empezou e prevese un aumento considerable de poboación no municipio.
"Levamos anos denunciando que a Consellería ten na súa política de recortes deixar de cubrir baixas, permisos, vacacións e xubilacións", lamenta, o que provoca "a saturación do persoal que está en activo e a listas de espera evitables. Nos dous centros de saúde do Concello sabemos as consecuencias desta neglixencia na saúde das veciñas e veciños".
Aboi insiste en que "non aceptamos que nos digan que non teñen a quen mandar, cando o conselleiro Caamaño fai anuncios día si día tamén da cantidade de persoal médico voluntario que teñen para o verán e os PACs".
"Que se deixen de propaganda, que iso non cura. Que vai pasar cando a médica en activo coxa vacacións? Como quedariamos se a esta médica lle pasa algo?", sinala.
Desde a Plataforma reclaman unha "solución urxente" para o problema xa que "quen sufrimos as consecuencias da mala xestión e planificacións da xerencia de área do Sr. Flores e da Consellería somos nós. Nós tamén seremos nós os que volveremos facer novas protestas porque non nos imos a calar ante a deterioración da sanidade de todas e todos", conclúen.