Este mércores 9 de maio, María Dolores Carmen García Aboy cumpre 104 anos. É unha das veciñas máis lonxevas de Cuntis.
O seu fillo Enrique comenta que ela está moi contenta, que se atopa en moi bo estado de saúde, e que non toma ningún medicamento, exceptuando un xarope para a tose antes de ir a durmir.
María Dolores casou moi nova, con 19 anos, e tivo sete fillos dos cales viven cinco. Enrique, o máis novo, ten 64 anos, e o maior, 83. Xa ten 14 netos, 12 bisnetos, e 5 tataranetos. Nin máis nin menos que catro xeracións.
Foi moi activa toda a súa vida, traballando no balneario desde as 5 da mañá e na labranza o resto do día, como moitas mulleres galegas da súa xeración.
Recibiu pola mañá a visita do alcalde de Cuntis, Manuel Campos, e da concelleira de servizos sociais, Conchy Campos, que quixeron acercarse a felicitala.