A asociación ecoloxista Vaipolorío anuncia unha nova xornada de traballo para este sábado, 17 de xaneiro, centrada no control e erradicación da Cortaderia selloana, coñecida popularmente como herba da pampa.
A intervención terá lugar na canle do río Tomeza (Gafos) a partir das 10:00 horas.
Nesta ocasión, o colectivo optará principalmente polo arrincado dos exemplares mediante o uso de maquinaria agrícola, unha técnica que permite extraer a planta de raíz de xeito máis eficaz e con menor esforzo físico para os voluntarios.
A herba da pampa é unha das especies exóticas invasoras máis agresivas en Galicia.
A súa gran capacidade de dispersión mediante sementes e a súa resistencia fan que colonice rapidamente as ribeiras, desprazando á flora autóctona e alterando o ecosistema do río.
Esta actividade forma parte do compromiso histórico de Vaipolorío coa recuperación do Gafos.
Dada a loxística da xornada e a necesidade de coordinar os equipos de traballo, a organización solicita ás persoas interesadas en colaborar que se inscriban previamente chamando ao teléfono de contacto para participar: 676 842 942.