O grupo municipal Veciñanza de Cuntis presentará no próximo pleno unha moción coa intención de que o Concello solicite formalmente á Deputación colaboración económica para o desenvolvemento do polígono industrial da Ran.
O portavoz da agrupación, Santi Martínez, argumenta que o polígono é "un eixo fundamental para o impulso socioeconómico que Cuntis necesita".
Para Veciñanza os anos que leva a área industrial sen regularizar provoca taxas de desemprego alarmantes e o descenso da poboación ligado á falta de oportunidades laborais.
Tanto Martínez como o seu compañeiro Xosé Lois Jácome ven na Ran un punto estratéxico, aseguran, pola súa posición privilexiada ao pé da estrada N-640, preto da AP9, do porto de Vilagarcía ou de cidades como Pontevedra e Santiago de Compostela.
A petición á Deputación baséase en que "non sería a primeira vez que a institución provincial faría unha achega deste tipo", explican en relación ao polígono industrial de Barro-Meis e pedindo que se inclúa unha partida respecto diso nos orzamentos de 2018.
Veciñanza pedirá ademais a creación dun viveiro de empresas na vila e a creación dun grupo de traballo municipal que inclúa a todos os grupos da corporación.