O barrio de Mollavao prepárase para un cambio a gran escala. O Concello de Pontevedra convoca a toda a veciñanza e á cidadanía a unha asamblea aberta na que se detallará o proxecto de reurbanización integral desta contorna.
A xuntanza celebrarase este xoves, 18 de decembro, ás 20.00 horas, no salón de actos do Edificio da Xunta de Galicia en Campolongo.
O acto contará coa presenza do concelleiro de Servizos urbanos básicos, Xaquín Moreda, acompañado por técnicos do gabinete OTIMA S.L., responsables da redacción do proxecto.
Durante a reunión, explicaranse con detalle as dúas actuacións que compoñen este plan unificado, é dicir, a reurbanización da rúa Rosalía de Castro e a apertura dunha nova vía de conexión coa avenida de Marín.
A reforma de Rosalía de Castro abranguerá o treito entre Manuel del Palacio e a ponte do ferrocarril, seguindo os estándares do chamado "Modelo Pontevedra". A calzada redúcese a un único carril de 3,30 metros en sentido saída, permitindo ampliar as beirarrúas ata un mínimo de 2 metros, e ata 3 metros na maior parte do percorrido.
O proxecto inclúe a renovación integral de servizos e alumeado LED e a creación de dúas zonas de coexistencia con prioridade peonil, fronte á praza de Mollavao e diante do colexio Juan Sebastián Elcano, garantindo máis seguridade e calidade de vida para veciños e escolares.
A segunda actuación consistirá na apertura dunha nova vía de conexión entre Rosalía de Castro e a avenida de Marín, sobre a coñecida como "parcela dos circos". Esta rúa de aproximadamente 100 metros terá dous carrís de 3,50 metros e beirarrúas de 3 metros, conectándose mediante dúas glorietas que axudarán a calmar o tráfico.
O proxecto permitirá desconxestionar Rosalía de Castro, desviando o tráfico de entrada cara á avenida de Marín e transformando unha zona actualmente degradada e usada como estacionamento indiscriminado nun espazo urbano seguro, con pasos de peóns sobreelevados e espazos de convivencia veciñal.
Con un orzamento base de licitación superior a 3,7 millóns de euros, o proxecto conta con todos os informes sectoriais favorables e está na recta final da súa tramitación administrativa. Tras recibir as autorizacións de Costas, Adif e a cesión da titularidade da antiga estrada pola Xunta de Galicia, o Concello xa está en proceso de licitación, con seis empresas interesadas en executar a obra.
O inicio dos traballos poderá producirse en canto se formalice a adxudicación, cumprindo así os compromisos adquiridos co convenio de colaboración asinado coa Deputación de Pontevedra.