O Concello de Marín recibe o recoñecemento da Asociación de Educación Ambiental e do Consumidor (ADEAC), que volveu premiar o Viario de Praias co distintivo de Sendeiro Azul, consolidando así este espazo como un referente turístico e ambiental da vila.
A alcaldesa, María Ramallo, acompañada das concelleiras Marián Sanmartín e Cristina Acuña, participou no acto de izado da bandeira conmemorativa que acredita este galardón.
Durante o evento, a rexedora destacou a importancia deste recoñecemento: "Sabemos que o noso Vial de Praias é un activo non só turístico, senón tamén medio ambiental que debemos preservar, coidar e mellorar".
Este itinerario peonil e ciclista, que une as diferentes praias con bandeira azul do municipio, converteuse nun elemento diferenciador da oferta turística de Marín.
Para potenciar aínda máis este recurso, o Concello ten prevista unha actuación de mellora da mobilidade no Vial, enmarcada no Plan de Sostibilidade Turística de Marín e financiada a través dos fondos europeos Next Generation EU.
O proxecto de mellora contempla unha intervención integral no itinerario peonil-ciclista, dotándoo de maior seguridade e conectándoo coa rede ciclable recentemente instalada na Avenida de Ourense, no casco urbano.
Ademais, eliminaranse as barreiras de accesibilidade existentes nos accesos ás praias ao longo do trazado e instalaranse aparcadoiros para bicicletas.
As actuacións de mellora do Viario de Praias xa comezaron con outros proxectos, como a renovación da iluminación en diversos puntos do percorrido, substituíndo as antigas luminarias por sistemas LED, máis eficientes e respectuosos co medio ambiente.