A XLVII Festa do Viño de Barro engade unha nova proposta ao seu programa de actividades coa celebración dunha xuntanza de coches e motos clásicas.
A cita desenvolverase o domingo 21 de xuño en horario de mañá, convertendo o Pazo da Crega nun punto de encontro para as persoas afeccionadas ao automobilismo e ao coleccionismo de vehículos históricos.
O público que asista á xornada poderá contemplar de preto modelos históricos, deseños icónicos de diversas épocas e motocicletas conservadas con detalle.
Trátase dunha iniciativa que busca atraer tanto á veciñanza do propio municipio como a visitantes e entusiastas do motor de toda Galicia, combinando a afección polos vehículos clásicos coa oferta gastronómica da vila.
A participación nesta concentración non ten custe económico, aínda que a organización require a inscrición previa obrigatoria dos vehículos para garantir unha correcta distribución loxística no recinto habilitado.
Para reservar praza, as persoas interesadas poden poñerse en contacto a través do número de teléfono 680 502 154 ou cubrir o formulario en liña habilitado para o evento.
Xosé Manuel Fernández Abraldes, alcalde de Barro, amosou a súa satisfacción pola incorporación desta actividade ao calendario festivo e trasladou o seu agradecemento ás persoas encargadas da organización polo traballo realizado.