Primeira visita a Tambo logo do acto de sinatura do acordo polo que Defensa cede ao Concello a illa por un período transitorio de 25 anos, prorrogable a 75. Unha vez asumidas as competencias sobre esta illa situada no fondo da ría de Pontevedra, o seguinte foi coller un barco e achegarse ata este espazo emblemático.
Os concelleiros non perderon o tempo e mudaron os carteis que prohibían o paso a este "recinto militar" de 28 hectáreas, por unhas lonas co nome da illa e o escudo do municipio de Poio.
A concesión establece un canon anual de 25.000 euros que ten como fin garantir os investimentos na illa, ainda que os labores de mantemento deste enclave xa exceden de maneira significativa a cantidade establecida no canon polo que, na práctica, non será necesario o seu pago a Defensa.
A illa conta con dúas praias (Area da Illa e Adreira), o pequeno faro de Tenlo, o lazareto de 1886, a polvoreira, a antiga residencia de oficiais e a capela de San Miguel (século XVI).
En virtude deste acordo co Ministerio de Defensa o Concello comprométese á protección e conservación dos bines culturais, arqueolóxicos e ambientais de todo este espazo así como á autorización e vixilancia das actividades lúdico-turísticas, de visita e investigación.
Os próximos pasos que dará o Concello son solicitar que Tambo sexa catalogado como Espazo Natural de Interese Local (ENIL) e redactará un Plan estratéxico e un Plan de usos para o futuro desta illa que ten un gran valor histórico e sentimental para Poio.
Se as previsións cúmprense, o próximo mes de maio empezarán as visitas a Tambo unha vez que o Concello arrombe o enclave para garantir a seguridade das persoas e a integridade da propia illa.
Para visitar Tambo vai ser necesario solicitar autorización para poder acceder, sempre en grupos reducidos.
Engade Pontevedra Viva como fonte preferida de Google de balde
Mantente informado coas últimas noticias de actualidade.