VÍDEO.- Un menú con sabor a camelia pecha o proxecto de innovación do CIFP Carlos Oroza

Pontevedra
17 de marzo 2018

Os estudantes de 2º Ciclo Medio de  Cociña e Gastronomía foron os encargados de elaborar un xantar utilizando esa planta como recurso. Entre as personalidades presentes no evento atópanse Carmela Silva, José Manuel Pinal ou Eugenia Fernández

Un peche con sabor a un proxecto innovador / Gabriela Varela

En forma de sal, a modo de guarnición ou mesmo como vermú. A camelia foi a protagonista este xoves 15 de marzo no peche de proxecto de innovación educativa 'A nosa camelia, tan curiosa como saborosa', no CIPF Carlos Oroza. 

O reto ofrecido aos estudantes de 2º de Ciclo Medio de Cociña e Gastronomía foi superado con fartura, e os comensais puideron gozar dun menú con toques innovadores propios da cociña máis vangardista. Para iso contaron coa axuda de Iñaki Bretal, chef do restaurante Eirado da Leña, e do profesor Paco Orge, que capitanearon aos estudantes no ritmo frenético das cociñas.

As mesas distribuídas no comedor recibiron o nome de distintos pazos galegos nos que podemos atopar esta tan popular flor. Os seus asentos foron ocupados por diferentes representantes das institucións colaboradoras, como a Fundación ONCE, a Asociación Juan XXIII ou a Deputación de Pontevedra. Entre eles destacan a presidenta da Deputación de Pontevedra, Carmela Silva, o Director Xeral de Centros, José Manuel Pinal, a subdirectora xeral de FP, Eugenia Fernández, a deputada Eva Vilaverde, o deputado Santos Héctor e a concelleira Anabel Gulías.

Os alumnos de 1º curso tamén puideron participar na xornada. Eles foron a cara visible do evento, xa que serviron os pratos e elaboraron os cócteles, explicándolles en ocasións aos asistentes o proceso de elaboración dos mesmos.

Pontevedra ten como elemento paisaxístico esencial a camelia, que podemos atopar en contornas tan emblemáticas como a Alameda ou a Praza da Ferrería. Manuel Hermo, director do centro, lembrou ao finalizar do xantar as connotacións da planta, que transmite ideas como a igualdade ou a humildade, xa que se atopa tanto en castelos e pazos, como en fogares máis simples.

Por ese motivo, o proxecto premiado pola Consellería de Cultura, Educación e Ordenación Universitaria tivo como idea principal explotar o potencial da planta como recurso económico na provincia, buscándolle unha saída turística gastronómica que poida, ademais, fomentar o emprego. Entre os produtos que poden servir como lembranza nas Rías Baixas, están as pastas de té ou as nubes, elaborados con distintas variedades de camelia.