Os vilagarciáns inscritos no padrón do Imposto de Vehículos de Tracción Mecánica poderán beneficiarse dunha hora gratuíta diaria nos aparcadoiros municipais.
A mesma medida estenderase aos clientes dos negocios asociados á entidade comercial Zona Aberta ou de calquera outra agrupación coa que o Concello asine un convenio, sempre cun límite de uso dunha vez ao día.
Esta é unha das principais novidades da nova ordenanza fiscal que regulará o funcionamento dos parkings públicos e que será tratada no pleno do vindeiro xoves 27.
A normativa non só fixa as bonificacións, senón tamén as tarifas e os prezos dos abonos, que variarán en función do tipo de vehículo (coche, moto ou bicicleta), da duración (12 ou 24 horas) e do período escollido (15 ou 30 días).
Para que todo isto poida entrar en vigor será necesaria a instalación dunha nova maquinaria actualmente en proceso de contratación, cun investimento previsto de 123.000 euros. Se o calendario se cumpre, as bonificacións estarán activas nas primeiras semanas de 2026.
A ordenanza xorde tras a recuperación municipal do aparcamento de Xoán XXIII, onde se aplicará inicialmente.
Con todo, o regulamento será extensible a calquera outro estacionamento cuberto de titularidade pública, como o da praia da Concha cando rematen os seus traballos de adaptación.
Ademais, o Concello lembra que, se finalmente se materializa a compra do parking da Praza de España, este tamén quedaría amparado pola nova normativa.
No que respecta aos prezos, establécese unha tarifa de 0,013 euros por minuto, cun máximo de 18,66 euros ao día.
Os abonos de 24 horas custarán 74,61 euros ao mes ou 55,96 euros por quince días; os de 12 horas -con franxas de 08:00 a 20:00 ou de 07:00 a 19:00- terán prezos de 59,69 euros e 44,77 euros, respectivamente.
Para motocicletas e bicicletas, haberá abonos mensuais de 24 horas por 37,31 euros e 14,92 euros.
Mantense, ademais, un abono herdado da etapa concesionada e reservado a traballadores municipais (37,31 euros), que o goberno local prevé reducir ou suprimir progresivamente para favorecer a rotación das prazas.
Na actualidade, os parkings funcionan en horario partido: de 08:00 a 22:00 no outono-inverno e de 08:00 a 00:00 na tempada de primavera-verán, con domingos e festivos pechados.
A chegada da nova maquinaria permitiría operar as 24 horas do día, mais iso esixe reforzar o persoal do servizo, un punto que os técnicos e o executivo municipal están aínda a avaliar.