O Concello de Vilagarcía dá luz verde ao proxecto para habilitar o novo centro municipal de servizos sociais.
É unha actuación orzada en 899.937,50 euros que permitirá concentrar nun único edificio toda a atención que actualmente se presta en diferentes dependencias da casa consistorial.
A Xunta de Goberno aprobou o proxecto redactado polo arquitecto Iago Fernández, responsable tamén doutras actuacións municipais como a escola infantil de Vilaxoán, o albergue de peregrinos de O Carril ou a reforma do pavillón de Fontecarmoa.
Con todo, aínda falta a autorización do Ministerio de Facenda, pois se trata dun proxecto financiado con fondos europeos.
Desde o goberno local afirman que esperan o seu visto e prace xa que esta actuación forma parte da Estratexia de Desenvolvemento Integrado Local (EDIL), que xa ten a súa conformidade.
En calquera caso, este trámite é indispensable antes de dar paso á fase de licitación que o executivo de Alberto Varela espera afrontar antes de que acabe o ano. Tal e como afirman desde o Concello, o prazo de execución unha vez adxudicadas as obras será de oito meses.
Doutra banda explican que os case 900.000 euros orzados súmanse aos 230.000 que xa destinaron previamente para a adquisición dos locais nos que se vai a actuar.
Trátase de catro baixos situados entre as rúas Eduardo Pondal e Os Duráns que, tras a reforma, quedarán unidos dando lugar a un único espazo de 500 metros cadrados con acceso desde a rúa Eduardo Pondal.
O obxectivo da construción do novo centro de servizos sociais é ofrecer unhas instalacións máis amplas e funcionais tanto para o persoal municipal como para os usuarios do servizo.
O proxecto contempla a creación de dez despachos para as Unidades de Traballo Social (UTS) ademais de espazos específicos para a Unidade de Primeira Atención, a dirección e a concellaría responsable da área.
Tamén incluirá salas de espera, unha sala de reunións, unha oficina aberta con catro postos de traballo, unha unidade administrativa con tres postos, aseos e zonas destinadas a instalacións, almacenamento e limpeza.
No exterior, o edificio renovará completamente a súa imaxe mediante unha fachada ventilada de chapas microperforadas de aceiro galvanizado.
É unha solución similar á utilizada na remodelación do pavillón Sara Gómez, co fin de modernizar un inmoble de varias décadas de antigüidade e unificar o seu aspecto en ambas as fachadas.
O goberno local destaca o seu compromiso co gasto social ademais da contribución deste proxecto á dinamización do propio barrio de Os Duráns.
Explican ademais que, antes de que este servizo se poña en marcha, xa estará en funcionamento o novo aparcadoiro disuasorio situado a menos de cen metros de distancia en Aquelino Iglesias.
Engade Pontevedra Viva como fonte preferida de Google de balde
Mantente informado coas últimas noticias de actualidade.