A Audiencia de Pontevedra condenou a 20 anos de cárcere a Florian Rama, o home de orixe albanesa que matou a puñaladas en 2019 a Soufian Mraha, un mozo de 25 anos, nas inmediacións dun local de copas de Salceda de Caselas.
O tribunal, de acordo co veredicto do xurado que decretou por unanimidade que Rama era culpable dun delito de asasinato con aleivosía, impúxolle ademais elevadas indemnizacións aos pais e aos irmáns da vítima.
Así, deberá pagar 70.175 euros a cada un dos dous proxenitores, mentres que cada irmán recibirá 24.836 euros.
Na sentenza, os maxistrados destacan que o xurado viu acreditado que Soufian Mraha faleceu polas feridas que lle causou a arma branca ao perforarlle o corazón.
Ademais, fundamentaron a aleivosía na "sorpresividade" do ataque, que estivo dirixido a zonas vitais, e a falta de oportunidades de defensa da vítima.
A xuíza redactora da sentenza explica que, neste caso, o tribunal do xurado "non ve suficientemente motivado o ensañamento" polo tipo de feridas sufridas pola vítima e a inmediatez das mesmas e do propio falecemento.
O tribunal sinala que o grao de culpabilidade "é o máximo neste caso", pois subliña que é "absolutamente desproporcionado" que Florian Rama matara o mozo cando o suposto detonante foi tirarlle unha copa minutos antes nun local de lecer.
Desta forma, os maxistrados recalcan que a vítima non concorreu "en ningún caso e nin sequera minimamente", á provocación do acusado, que traía xa de casa unha arma branca "e non dubidou en utilizala en canto tivo ocasión".
Na resolución, destacan as declaracións das testemuñas, entre eles os que tiveron un altercado previo dentro da discoteca e que "percibiron o ánimo de buscar pelexa" que Rama mantivo durante toda esa noite.
Ademais, o fallo lembra que outras testemuñas apuntaron que viron como a vítima trataba de desculparse e mesmo de pagarlle outra copa, "sen poder convencer ao que logo sería o seu asasino, nunha actitude conciliadora e non violenta da vítima".
A sentenza non é firme e pode ser recorrida ante o Tribunal Superior de Xustiza de Galicia.