A xornalista, escritora e activista Cristina Fallarás será a protagonista da próxima sesión dos Faladoiros Feministas, o ciclo promovido pola Concellería de Igualdade dentro do programa Primavera Feminista.
O encontro será o mércores 20 de maio ás 19.00 horas no Paraninfo do IES Valle-Inclán, con entrada libre até completar aforamento.
A proposta, 'Rachando o silencio das violencias', convida a reflexionar e debater sobre a capacidade das mulleres de dicir basta e o poder que teñen ao construír unha historia colectiva, empoderada e alternativa á hetero-patriarcal dominante.
Fallarás é unha das voces máis destacadas do feminismo en España. En 2018 impulsou o movemento #Cuéntalo, unha iniciativa que recolleu millóns de testemuños en primeira persoa sobre violencia sexual. Parte dese material foi documentado polo Barcelona Supercomputing Center na páxina proyectocuentalo.org, onde están recompilados o tres primeiros millóns de relatos.
Desde agosto de 2023, desenvolve un proxecto de arquivo de testemuños sobre violencia machista que xa reúne miles de voces. O seu traballo busca visibilizar estas experiencias e evitar que caian no esquecemento.
O seu feminismo e activismo está reflectido nos ensaios 'No publiques mi nombre' (2024), centrado en casos de violencia machista; 'El final de todo esto' (2024), que reivindica o papel das mulleres ao longo da historia; e '#Cuéntalo: una memoria colectiva de la violencia' (2019).