Volve a festa de San Patricio. O Mareantes Rugby Club, que este ano cumpre 35 anos de actividade, xa ten todo preparado para celebrar o seu tradicional festival galaico-irlandés. Será na Praza de España, a partir deste mércores 15 de marzo.
San Patricio, que se festexará ata o domingo 19, é xa un evento "imprescindible" para Pontevedra, segundo destacou a concelleira de Promoción Económica, Yoya Blanco, que animou a toda a cidadanía a que se achegue a gozar da súa undécima edición.
Todo o diñeiro que se recade este San Patricio servirá para financiar a actividade deportiva do club, que actualmente conta cunhas 180 fichas, das que unhas 140 corresponden ás escolas de categorías inferiores, explicou o seu presidente, Roberto Juncal.
O Mareantes manterá os prezos populares de edicións pasadas, aínda que algúns dos produtos experimentarán un lixeiro aumento de 50 céntimos, debido ao custo actual das materias primas e a necesidade de recadar máis diñeiro para soster as escolas deportivas.
Así, as pintas de cervexa custarán 5 euros (6 no caso da Guinness), os refrescos serán 2,50 euros e a auga, 1,50 euros. Para comer haberá salchicha irlandesa (5 euros), hamburguesa especial (5 euros), xamón asado (5 euros) ou cachorro (3 euros).
Como é habitual, o festival de San Patricio estará amenizado coa música de bandas e artistas locais de Pontevedra. O primeiro concerto, o día inaugural da festa, será a de Ariadna Santana, que actuará na carpa da Praza de España ás 21:00 horas.
O xoves 16 será a quenda de Mad Martín (20:00 horas) e Mr. Magoo (22:00 horas), mentres que o venres 17 actuarán Pablo Charlo (19:30 horas) e Desconcerto (22:00 horas) e o sábado 18, Gyn Toni (20:00 horas) e Son das tabernas (22:00 horas).
Para o domingo, xa en sesión vermú, quedará o concerto de Sr. Nilson (12:20 horas).