Houbo unha época na que Pontevedra non contaba cun movemento social antitouradas organizado, pero algunhas mañás amencían coas rúas cheas de carteis contra as touradas que se celebraban durante a feira da Peregrina. Pasado o tempo, sábese que quen estaba detrás desas accións reivindicativas era a escritora e profesora María Vitoria Moreno, homenaxeada este ano co Día das Letras Galegas e fiel defensora dos animais.
Este 2018, declarado en Pontevedra 'Ano María Vitoria Moreno', hai quen na súa cidade quixo seguir homenaxeando á escritora máis aló das celebracións que rodearon o 17 de maio e facelo, ademais, lembrando ese activismo antitouradasque ela sempre levou por bandeira. Para iso, alguén empezou a pegar carteis lembrando esas accións de rebeldía súas de décadas atrás.
Un deses carteis apareceu no barrio de Campolongo, ao que María Vitoria Moreno sempre estivo moi unida por ser o seu lugar de residencia e lecer. Sobre un dos anuncios das touradas da praza de touros de Pontevedra, xusto a mesma forma de protesta que elexía ela, quixeron lembrar que "fixo manifestacións contra as touradas todos os anos, ía coas nenas, onde os carteis que anunciaban as corridas e pegábanlle por riba frases en defensa dos animais, que sacaba do Quijote e doutros libros".
Precisamente, a filla da profesora, Begoña Llácer Moreno, foi elixida este ano para ler o manifesto da manifiestación antitouradas que organizará o colectivo 'Touradas fóra de Pontevedra' polas rúas da cidade o vindeiro sábado 11 de agosto.