Finaliza o curso escolar, empeza o verán e, como cada ano, chega unha cita xa tradicional no centro histórico de Pontevedra: a festa de Fin do Cole do Centro Comercial Urbano Zona Monumental.
Durante toda a tarde do sábado 14 de xuño encherá as rúas da zona vella de Pontevedra de nenos, nenas e diversión.
O motivo deste adianto da festa sobre as datas que adoitan ser habituais é debido á celebración do Campionato do Mundo de Tríatlon Multideporte.
Para conmemorar tan sinalada data, Zona Monumental instalará inchables por algunhas das zonas máis emblemáticas do centro histórico, as prazas de Curros Enríquez, Méndez Nuñez e Valentín García Escudero e a rúa Serra.
Na Praza de Curros Enríquez estará o rocódromo e un mural colaborativo, mentres que en Méndez Núñez estarán os pinta caras e a ludoteca.
O taller de manualidades situarase na Praza Valentín García Escudero e na Rúa Serra haberá máis inchables.
Pero, como sempre, o momento estrela da tarde chegará a partir das 19.30 horas na praza da Pedreira coa habitual festa da escuma.