A destrución de obxectos de importancia histórica e artística trátase oficialmente como un crime de guerra. 

Isto representa un dano non só para o patrimonio cultural de Ucraína, como establece a Convención da Haia sobre a Protección dos Bens Culturais en caso de Conflito Armado: os danos causados aos bens culturais, independentemente da nación á que pertenzan, constitúen danos ao patrimonio cultural de toda a humanidade, xa que cada nación ten o seu parte neste desenvolvemento.

O Museo Nacional de Polonia, que este xoves visitou unha delegación da Deputación de Pontevedra, acolle unha exposición que constitúe un xesto solidario en defensa do patrimonio e da humanidade.  

O goberno de Polonia dispuxo almacéns en museos para recibir patrimonio cultural ucranio e preservalo durante a guerra que se libra no seu territorio.

Pawel Napierala é un dos expertos en arte ao que o viceministro de Cultura e Patrimonio de Polonia, Yaroslav Sellin encomendou esta misión de rescate.

Así, os representantes da Deputación de Pontevedra visitaron as pinturas do artista Jacek Malczewski que foron retiradas da Galería de Arte de Leópolis e agora atópanse en chan polaco expostas neste Museo Nacional de Poznan.

Pawel Napierala fixo de guía á expedición pontevedresa nesta curiosa exposición que "evidencia a fraxilidade da arte" e da que recalcou o seu carácter temporal que persegue "salvagardar estas obras e deixalas a recado". Por iso é polo que os cadros convivan xunto ás caixas nas que foron transportados para o seu depósito.

As pinturas expostas inclúen autorretratos, paisaxes e escenas mitológicas e bíblicas de Malczewski.

Desde o inicio da guerra, a finais de febreiro de 2022, Polonia prestou axuda a Kiev para preservar bens de interese cultural, especialmente nun intento de protexer monumentos e reconstruír fachadas, igrexas e museos afectados polos bombardeos.

Tamén axudan aos ucraínos para facer un inventario dos bens destruídos co propósito de auxiliarlles no proceso de reconstrución cando a guerra termine.