Os "lugares máxicos" de Carlos Núñez recalan con gran éxito en Tenorio
Por Redacción
Castelos, igrexas, mosteiros, pazos, xardíns singulares ou ata un parque arqueolóxico. Eses son os escenarios nos que Carlos Núñez está a estrear o seu novo espectáculo musical. O seu nome non podería ser máis adecuado: Lugares máxicos.
E un dos últimos lugares máxicos que elixiu o gaiteiro para presentar a súa música en Galicia, antes de iniciar a súa xira nacional e internacional, ía ser o atrio da festa de Tenorio. Pero a choiva frustrou os seus plans e a actuación trasladouse ao centro sociocultural do lugar.
O músico galego conquistou ao público que encheu o aforo do recinto e que, ademais de Cerdedo-Cotobade, eran de Vigo, Pontevedra, Madrid, Barcelona, Córdoba ou Cádiz, así como de países como Brasil, Colombia e Arxentina.
No seu concerto, o gaiteiro e os seus músicos intercalaron os temas do seu novo traballo e parte dos seus éxitos máis coñecidos.
Foi así unha especie de viaxe artística desde a orixe da música tradicional e das músicas celtas ata as últimas investigacións e colaboracións que foi facendo o artista.
Durante a súa actuación, Núñez confesou sentirse ilusionado por estar de novo en Cerdedo-Cotobade e lembrou a figura de Ricardo Portela, o gaiteiro universal nacido en Viascón
Antes do comezo do concerto, o alcalde de Cerdedo-Cotobade, Jorge Cubela, agradeceu ao artista que por segundo ano consecutivo elixira esta vila para traer o seu espectáculo.
Cubela destacou ademais o legado cultural e musical do municipio, conservado e transmitido por persoas da talla de Antonio Fraguas, Ricardo Portela e Antonio Fraiz, entre outros moitos.