'Sons de Outono' levará a música de fusión a pé de rúa
Por María José Pita
Tras a exitosa experiencia o ano pasado co 'Outono de Jazz', neste 2023 o Seminario Permanente de Jazz de Pontevedra, en colaboración co Concello, presenta 'Sons de Outono'. Cambio de nome para un ciclo de música a pé de rúa que ademáis do jazz, ábrese a outros estilos como a bossa nova, o blues, o soul, o rock instrumental ou mesmo o hardcore.
'Sons de Outono' achegará as músicas de fusión á cidadanía no mediodía dos sábados coa idea de consolidarse no calendario musical de Pontevedra máis aló das programacións dos meses de verán.
A partires deste sábado 11 de novembro e durante catro sábados consecutivos, ofrecerá concertos de grupos emerxentes aínda que formados na súa maioría por músicos consolidados.
A cita será os sábados 11, 18 e 25 de novembro e o sábado 2 de decembro ás 12:00 na Praza da Peregrina. No caso de choiva, os concertos trasladaranse ao Palco da Música na Alameda.
A presentación de 'Sons de Outono' tivo lugar este venres no Consistorio pontevedrés a cargo do concelleiro de Cultura, Demetrio Gómez, e Luis Carballo, coordinador do Seminario Permanente de Jazz.
RED TREE ABRE O CICLO
Abre este ciclo o sábado 11 de novembro o grupo compostelano de jazz, Red Tree, coa voz de Inés Carreño, o contrabaixo de Pablo Sanmamed e a guitarra de Marcos Pin.
Xuntos dan vida a esas pezas do songbook norteamericano "que todos tarareamos algunha vez e recoñecemos na primeira escoita", indican dende a organización. "Standards e clásicos que nin pasan de moda nin desapercibidos neste trío".
PROGRAMACIÓN DE 'SONS DE OUTONO'
Sábado 11 de novembro
RED TREE
Inés Carreño: voz
Pablo Sanmamed: contrabaixo
Marcos Pin: guitarra
Sábado 18 de novembro
TRIOGÈNESIS
Daniel Corral: piano
Yudit Almeida: contrabaixo
Brais Lorenzo: batería
Sábado 25 de novembro
SICIXIA QUARTET
María Villanueva: voz e guitarra
Javier Abraldes: guitarra
Berto Rial: contrabaixo
Luis Vivas: batería
Sábado 2 de decembro
DOWN UNDERGROUND
Robert Beade: guitarra
Santi Marsán: baixo eléctrico
Manuel Bastón: batería
Relacionadas:
-
'Sons de Outono' chega ao seu fin cunha última xornada musical na Peregrina
Por Redacción & Cristina Saiz |
-
O 70% dos músicos de jazz en Galicia veñen da man do Seminario Permanente de Pontevedra
Por Oskar Viéitez |
-
Do 7 ao 11 de agosto, blues e soul vibrarán na Ferrería no 29º Festival Internacional de Jazz e Blues
Por Anxo Lourido |
-
Outono de Jazz, un novo ciclo de concertos para achegar o jazz á rúa
Por Redacción |