Que relación hai entre o petróglifo da Laxe e o tradicional 'bolo de ovos' que os padriños de Caldas regalan en Pascua ás súas afilladas?
Por Oskar Viéitez
Que significan as coviñas que hai furadas na pedra da Laxe dos Bolos? Por que moitos dos gravados están nas partes máis húmidas? Que relación hai entre o petróglifo da Laxe e o tradicional 'bolo de ovos' que os padriños de Caldas regalan en Pascua ás súas afilladas? Que pasa no Xiabre no solsticio de verán? Todas estas cuestións e moitas máis curiosidades que foron analizadas e estudadas nos últimos anos polo equipo de arqueoloxía que traballou na Laxe dos Bolos terán resposta este venres día 17.
O Concello de Caldas de Reis presentará ás oito da tarde nun acto aberto ao público no auditorio o libro que recolle o traballo arqueolóxico desenvolvido sobre A Laxe, un dos conxuntos rupestres máis destacables do noroeste da Península Ibérica.
Estarán presentes as dúas persoas autoras, a investigadora Elena Cabrejas Domínguez do Instituto de Ciencias do Patrimonio (INCIPIT) do Consello Superior de Investigacións Científicas e Manuel Santos Estévez, responsable da análise e interpretación dos gravados, xunto ao tenente de alcalde Manuel Fariña.
Baixo o título 'O santuario da Laxe dos Bolos. Cando o sol alumea a vella montaña', o libro (do que hai editada unha tirada de 300 exemplares) componse de nove capítulos e 125 páxinas nas que se fai un percorrido polo contexto, a época, as características da arte rupestre atlántica, as particularidades do Xiabre e a contorna que dan lugar a unha visión holística e multidisciplinar da relevancia do petróglifo.
A obra recolle tamén os apartados principais que aportan o significado e a interpretación a moitos dos motivos representados, mentres que os derradeiros capítulos falan da divulgación e posta en valor da laxe, dando lugar a un traballo integral visualmente moi atractivo grazas a moitas fotografías e recreacións de alta calidade.
A Laxe dos Bolos é un espazo con forte contido simbólico e ritual que estivo en funcionamento máis de 5.000 anos, do Neolítico á Idade de Ferro, tendo características de santuario prehistórico.