O Maratón de San Antón logra vencer a chuvia na súa XXXVI edición
Por Redacción
A mala climatoloxía restou protagonismo ao deporte na XXXVI edición do tradicional Maratón de San Antón, en Cuntis.
Restou afluencia de atletas pero non detivo á carreira popular, na que participaron finalmente 175 deportivas na súa categoría absoluta, xa que as carreiras de menores foron aprazadas ata o día 20 de setembro.
Os atletas percorreron os 10.000 metros de percorrido, polo centro da vila termal, con saída e chegada xunto ao Balneario.
O máis rápido en facelo foi o triatleta de Dodro Uxío Abuín cun tempo de 33 minutos e 54 segundos. Acompañárono no podio masculino José Antonio Ramallo (34:29) e Hugo Loureiro (34:59).
Pola súa banda en categoría feminina a vencedora foi a deportista local Monserrat Pereira (43:18), seguida de Rocío Carbia (44:24) e Guadalupe Lodeiro, (44:52).
Un dos organizadores do Maratón de San Antón, Alfonso Iglesias, sinalou que malia o clima, con fortes ventos e chuvia, "a proba celebrouse con éxito e sen incidencias".