O Lérez, escenario dun animado Open Cidade de Pontevedra de piragüismo
Por Redacción
Máis de 400 deportistas participaron esta fin de semana na primeira edición do Open Cidade de Pontevedra de media maratón, unha proba que serviu para testar o circuíto do próximo campionato de Europa de piragüismo maratón que se celebrará en Pontevedra a finais deste mes de xuño.
Foi un gran espectáculo o que brindaron os participantes neste torneo, especialmente nas zonas de porteo onde os padeeiros tiveron que cargar a pé coa súa piragua.
Os vencedores en K2 senior foron os internacionais do Kayak Tudense Diego Piña e Iván Alonso, mentres que Tono Campos e José Sánchez do Breogán do Grove gañaron en C2. Entre as mulleres, o ouro na proba de K2 senior foi para a embarcación formada por Lorena Jubón e María Lancho do Cidade de Lugo.
Na modalidade individual, o vencedor en K1 senior foi Jesús León do Fluvial O Barco, Damián González do Piragüismo Verducido foi o primeiro en C1, Nuria Villace do Breogán do Grove terminou primeira en K1 e Marine Sansinena gañou en C1.
Foi o Club de Mar Ría de Aldán o que levou o trofeo de vencedor nesta primeira edición dunha proba que aspira a ser habitual no calendario galego cun total de 1.141 puntos, seguiulle en segunda posición o Club Naval de Pontevedra con 1.037 puntos e terceiro con 1.006 puntos foi o Club As Torres.
Os resultados completos da proba pódense consultar na web da Federación Galega de Piragüismo.
A clasificación xeral de clubs puntuable para as ligas masculina e feminina senior e xuvenil era outro dos puntos interesantes da xornada.
O Club Piragüismo Vilaboa levou a vitoria en senior masculino por diante do Club Kayak Tudense e o Naval de Pontevedra. En cambio, na xeral feminina o triunfo levouno o Ría de Aldán, segundo foi o Club As Torres e terceiro o Breogán do Grove.