Participación de nivel para a terceira Lanzada Ocean Race
Por Redacción
A praia da Lanzada será escenario este sábado, 3 de decembro, da terceira edición da Ocean Race, contando cunha participación de luxo.
Entre os inscritos figuran grandes campións do piragüismo autonómico, como Carlos Pérez 'Perucho' na categoría Master ou os padeeiros do Kayak Tudense Iván Alonso, Rubén Millán e Roi Rodríguez na categoría senior.
Preto dun cento de deportistas tomarán a saída desde as 15:30 horas no areal pontevedrés, fronte ás oficinas de Tartaruga Surf.
A competición celebrarase nas modalidades de Surfski e Padle Surf.
A saída de Surfski darase coas piragüas preto da auga e os participantes a 50 metros, que terán que correr para subirse á súa embarcación e dirixirse á liña de meta que estará situada na praia de Silgar, con 15 quilómetros de percorrido.
Pola súa banda os participantes de Padle Surf partirán ás 16:00 horas desde a praia de Major.