A Xunqueira contempla as primeiras suores granates
Por Ramiro Espiño
Tras a presentación chegan as primeiras sesións de traballo para o Pontevedra, que comeza a súa pretemporada de forma gradual con sesións só de mañá, no sintético da Xunqueira.
Luismi xa fixo suar aos seus, aínda que de momento sen pisar a fondo para protexer aos xogadores de posibles lesións que logo compliquen a preparación. Este xoves e venres, os granates adestraron pola mañá, e afrontarán unha terceira xornada de traballo na mañá do sábado (10:30 horas).
Logo haberá descanso. E é que, pese ao apertado calendario de amigables programados, o técnico deixou sen compromisos os domingos, para dar libre ao plantel e que poida recuperarse dos esforzos acumulados.
A falta de intensificar o traballo, con xornadas de dobre sesión, que moi posiblemente comezarán a partir da seguinte semana, os xogadores van coñecendo aos seus novos compañeiros, nun grupo amplo, con 25 homes, incluídos os canteiráns, que buscan gañarse a confianza do técnico.
E tamén queda por completar o pastel. A dirección técnica segue peiteando o mercado en busca dun goleador que ocupe a única ficha libre que queda dispoñible para maiores de 23 anos, e que substitúa a Joselu, tras frustrarse a fichaxe do dianteiro do Racing de Ferrol, cando practicamente estaba apalabrado e pechada a súa contratación.
Tampouco se pode descartar unha segunda fichaxe máis. Neste caso sería un medio organizador, aínda que para iso habería que facer oco no plantel.
Por diante unha semana aínda de traballo para ir perfilando ideas e conceptos futbolísticos, antes da esixente estrea co primeiro amigable da pretemporada o 21 de xullo, en Avilés, fronte ao Real Sporting de Gijón (12:00 horas).
Relacionadas:
-
Boa imaxe do Pontevedra en Avilés fronte o Real Sporting, no primeiro test de pretemporada (1-1)
Por Ramiro Espiño |
-
O Pontevedra apura a súa preparación ante o primeiro e "esixente" test de pretempada
Por Diego Espiño |
-
O Pontevedra mantén prezos dos abonos e pecha o calendario de pretemporada
Por Ramiro Espiño |
-
Brillante posta en escena do Pontevedra 2018/2019 con oito caras novas
Por Ramiro Espiño & Diego Torrado |