O Teucro presenta a campaña de socios para a tempada 19-20

O Teucro vai polos 1.500 socios para a próxima tempada

Por Manu Otero
Venres 9 de Agosto, 2019 ás 13:25 do Venres 9 de Agosto, 2019

O Teucro presentou este venres a súa campaña de socios para a próxima campaña na que o obxectivo é manter os 1.300 abonados do curso anterior, aínda que o presidente, Carlos García Alén, aspira a superar por primeira vez a barreira dos 1.500 socios aproveitando que o próximo ano o club celebra o seu 75 aniversario.

Os prezos dos abonos son os mesmos que na anterior campaña na que o carné familiar ten un prezo de 200 euros, o sénior, 120; o de penas, 100; o bonificado, 70; o xuvenil, 25; e o infantil, 15.

"É unha campaña para ilusionar aos socios e a toda a cidade", dixo o mandatario teucrista. O deseño da campaña explicouno Laura do Castelo e componse de dúas pezas por unha banda un logo dos 75 anos que cumprirá o club o próximo ano envolto en chamas e, por outro un esquema circular que explica por que o Teucro necesita a todos os estamentos da sociedade pontevedresa para manterse vivo.

A razón pola que o club non reduce o prezo dos abonos para pesar do descenso radica en que este ano a cota que o club debe pagar polo concurso de acredores increméntase este ano. "O club é dos socios e necesitámolos", rematou o dirixente.