Víctor Loira encara unha nova "tolemia" para dar visibilidade ás enfermidades intestinais
Por Manu Otero
O deportista extremo Víctor Loira competirá os días 10, 11 e 12 de outubro no Ultra Tríatlon Terra Astur, unha proba dividida en tres etapas na que os participantes completarán unha distancia total de 500 quilómetros. O atleta marinense, que padece a Enfermidade de Chron e porta unha bolsa de ostomía, marcouse este reto co obxectivo de dar visibilidade ás enfermidades intestinais e reclamar unha mellor atención por parte dos gobernos. "É unha tolemia, pero tamén o é vivir como vivimos", declarou o triatleta no anuncio da súa presenza nesta proba que tivo lugar no Concello de Pontevedra.
Acompañado pola concelleira Yoya Blanco e a presidenta de ASSEII (Asociación Socio Sanitaria Educativa Inflamatoria Intestinal), Loira recoñeceu que dos quince deportistas inscritos na proba, só el presenta patoloxías. Por iso a súa estratexia de carreira será diferente á dos demais. "O que me dá máis medo é a natación", dixo sobre a proba coa que comezará o desafío.
Na primeira xornada os deportistas deberán completar 10 quilómetros a nado e 140 quilómetros en bicicleta con dúas subidas ao Alto do Fito, porto habitual no percorrido da Volta a España. Ao día seguinte terá lugar unha carreira de 270 quilómetros en bicicleta polo escarpado territorio asturiano, sempre na contorna de Ribadesella. A cita concluirá cunha carreira a pé de 84,4 quilómetros na que Loira irá acompañado da súa muller. "Correrei 10 quilómetros e logo camiñarei outros dous acompañado pola miña muller", explicou o marinense a súa estratexia para poder completar o esixente percorrido.
"Se non se logra o reto, si se logra", declarou a presidenta de ASSEII, Ángela Paz, para lembrar que o verdadeiro obxectivo é dar visibilidade a este tipo de enfermidades coa intención de conseguir unha mellor atención para os pacientes que pasan polo recoñecemento da súa discapacidade, conseguir máis investimento en investigación e tratamentos, así como a instalación de baños para ostomizados, persoas que levan unha bolsa axustada ao corpo conectada ao seu intestino.
"Víctor Loira encarna a loita de que o deporte e os ostomizados son compatibles", quixo resaltar Blanco antes de ceder a palabra ao protagonista.
Relacionadas:
-
Víctor Loira regresa ao Ultra Tríatlon Terra Astur para dar luz ás enfermidades intestinais e a ELA
Por Manu Otero |
-
Víctor Loira será o pregoeiro das Festas do Carme de Marín
Por Redacción |
-
RADIO.- Este mes farase a segunda intervención con células nai a outra nova enferma de Crohn
Por Marisa Ciordia |
-
850 quilómetros en bicicleta para visibilizar as enfermidades inflamatorias intestinais
Por Redacción |
-
Víctor Loira chega a Pontevedra na súa volta a Galicia polas doenzas intestinais
Por Oskar Viéitez & Diego Torrado |