Charles e Rufo, reclamos do campus de verán do Pontevedra
Por Diego Espiño
O mes de xullo será un mes de campus no Pontevedra Club de Fútbol.
A entidade granate presentou este venres o 'Ponte Campus', que desenvolverá durante catro semanas do mes de xullo con adestramentos e actividades no Estadio Municipal de Pasarón e a Cidade Infantil de Príncipe Felipe.
"Nuestros mejores entrenadores formarán parte del campus", confirmou a presidenta do club, Lupe Murillo, sobre un campus que estará dirixido por Gelillo, David Montes e Álvaro Sanjorge.
Ademais como aliciente os deportistas recibirán a visita de dous dos futbolistas máis destacados do club: "Entrenarán con ellos Charles y Rufo", sinalou Murillo.
As actividades desenvolveranse en catro quendas (5 ao 9 de xullo, 12 a 17, 19 a 23 e 26 ao 30 de xullo) en horario de 9.00 a 14.00 horas. Todo eles dirixido a nenos e nenas nacidos entre 2007 e 2017 cun límite de 50 prazas por quenda.
O prezo para participar, segundo as semanas de duración, será de 120, 195, 265 e 335 euros por neno con desconto para xogadores do club (100, 160, 240 e 300 euros) e para segundo irmán (90, 130, 170 e 200 euros), incluíndo un equipamento de camiseta, pantalón e suadoiro.