![](/web/cache/scene/uploads/fotos/foto/946/_S7QytKoutjK3UsovKMnMzytWsi62MgJyq/Lzc52L8gt0zCwMdI_/_wNDHSSU/NKUot0SvILlKxrAQ==_/6032afdb31-20210221-saiz-pasaron-partido-futbol-pontevedra-compostela-025.jpg)
© Cristina Saiz
O Pontevedra 'pesca' de novo no Compostela e ficha o central David Soto
![Diego](/web/cache/scene/uploads/xornalistas/foto/5df/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/570532d2ea-20160329-patxot-diego-espino-1009.jpg)
Por Diego Espiño
Nova fichaxe no Pontevedra Club de Fútbol, que acelera na composición do seu novo plantel a pesar de non confirmar aínda ao seu adestrador.
O club granate anunciou este venres a incorporación de David Soto, defensa central que as dúas últimas campañas defendeu as cores da Sociedad Deportiva Compostela.
O defensor ourensán concluía contrato no cadro santiagués, e aínda que contaba coa opción de continuar terminou decidíndose pola proposta que lle fixeron chegar desde o Estadio Municipal de Pasarón, seguindo os pasos do dianteiro Brais Abelenda.
Soto concluíu a súa etapa de formación no Celta de Vigo, club no que debutou na Segunda B da man do filial celeste para despois pasar por Almería B, Boiro, Cerceda e Lorca.
Coa súa incorporación, a sexta neste mercado estival, son xa 17 os futbolistas confirmados polo Pontevedra para o seu próximo proxecto deportivo coas renovacións de Churre, Santi, Martín Diz, Álvaro Cortés e os canteiráns Iñaki e Pacheco, as fichaxes de Brais Abelenda, Diego Seoane, Javi Rey, Pablo Cacharrón e Samu e os cinco futbolistas que contaban con contrato en vigor como son Charles, Rufo, Oier Calvillo, Álex González e Romay.