Conceden a Pontevedra a organización do Campionato de España Sub-18 de Atletismo por Autonomías
Por Diego Espiño
As pistas de atletismo do Centro Galego de Tecnificación Deportiva de Pontevedra serán sede en 2024 dun Campionato de España.
Así o aprobou a fin de semana a Xunta de Goberno da Real Federación Española de Atletismo, seleccionando á Boa Vila como sede do Campionato de España Sub-18 de Federacións Autonómicas.
Trátase dun evento que adoita contar cunha alta participación de atletas, ao redor de medio milleiro, e que se fixou no calendaio para o día 22 de xuño de 2024.
Será pois unha fin de semana tremendamente deportiva en Pontevedra, pois coincidirá a escasos metros co Campionato de España de Tríatlon por Clubs previsto para o sábado 22 e domingo 23 de xuño.
Ademais desta competición, a Federación Española designou a Galicia como sede dun dos seus grandes campionatos, o Nacional Absoluto Baixo Teito que terá lugar en Ourense do 16 ao 18 de febreiro.