"Parece que isto está moi morto... ", cantou María Xosé Silvar, coñecida como Sés, nada máis saltar ao escenario da praza da Ferrería este domingo. A letra dunha das súas cancións máis coñecidas, Co xenio destrozado, do disco que leva o mesmo nome, non se correspondía en absoluto co ambiente que se vivía na praza. Dende o primeiro minuto do concerto os asistentes e o ambiente estaban moi vivos e a praza aplaudiu, cantou e vibrou entregada á cantante revelación.
Cando saíu ao escenario pouco despois das 21.00 horas parte do público esperábaa sentado no chan, pero poucos minutos despois Sés conseguiu que a práctica totalidade se puxese de pé e se implicase nun concerto que a cantante quixo dedicar a "todos os que seguen loitando polos nosos dereitos".
As súas cancións cargadas de mensaxe e ton reivindicativo cobraron maior forza acompañadas dun discurso no que se confesou "moi contenta de estar aquí hoxe en Pontevedra", tanto porque esta cidade é unha das que máis o atrae para tocar como polo día no que coincidiu a actuación, o Día da Galiza Mártir.
Ante o "luxo" de poder tocar o día en que se recorda o fusilamento de Alexandre Bóveda na Caeira (Poio), María Xosé Silvar acordouse do político pontevedrés e de "todos os que defenderon o que nós somos, pese a quen lle pese".
Xa á guitarra, recordou aos músicos e cantautores que tivo a sorte de escoitar na súa infancia, como o arxentino Cafrune, que "morreu por non acatar a lei do silencio", ao igual que "moitas persoas que foron axusticiadas ao longo dá historia" pola defensa das súas ideas.
Co seu discurso galleguista e feminista e un estilo que vai dende o blues ao rock e moi marcado polos ritmos do continente americano, Sés meteuse o público no peto. Soaron cancións do seu pimer disco, Admirando a condición (2011) e do segundo, Co xenio destrozado (2013), todos temas que xa interpretara en ocasións anteriores en Pontevedra, pero o público entregouse coma se fose a primeira vez. Foi a última das actuacións das Festas da Peregrina na Ferrería.