As bandas emerxentes de Pontevedra teñen unha cita co público da cidade. Será no ciclo En clave local, que levará a súa música ata o Parque das Palmeiras durante as dúas próximas fins de semana, os días 11, 12, 18 e 19 de xuño concretamente.
Actuarán un total de 14 bandas, cinco delas integrantes do proxecto municipal Xeración Sónica. Trátase de Simpsonhead, Rancheras, Froalla, Haku e Faul, que darán o seu concerto o sábado 12 a partir das sete da tarde.
O venres 11 será a quenda de Fuzz Faces (19:00), Skirl (20:30) e Rodrigo Valiente (22:00); o venres 18 actuarán Malecho (19:00), Liberad al Kraken (20:30) e Denova (22:00); e o sábado 19 pecharán o ciclo Las Gringas (19:00), Flip Corale (20:30) e Dr. Excepto (22:00).
Este é un programa cultural que forma parte da programación das Festas de Verán de Pontevedra, organizadas este ano baixo o lema O Son da Rúa.
Todos os concertos serán de balde e non precisan reserva previa. Haberá espazos aforados nos que son de obrigado cumprimento as normas de seguridade vixentes contra a covid-19.