Todo o centro histórico de Pontevedra converteuse este sábado nun gran escenario no que se escoitou música en directo e en galego. Ese era o obxectivo da xornada grande da quinta edición do festival Galegote Rock, un evento cultural que xa está plenamente consolidado na programación da cidade.
Desde o mediodía, unha decena de bandas e artistas actuaron en diferentes espazos do centro histórico, ben a cuberto -porque xa estaba previsto así ou pola choiva- ou ben en ámbitos ao aire libre a medida que foi mellorando as condicións climatolóxicas.
Tanto nos ten, O cadelo lunático, O xabarín de Bora, Davide Salvado, Alley Stompers, Tatán Chapeu, Mike Grelo e curmán, Poetarras, Sokram ou Falabaratas foron animando unha xornada que tivo, como acto principal, un dobre concerto no cruceiro das cinco rúas, a cargo das bandas Champurrada e Familia Caamagno.
Centos de persoas participaron nos concertos programados do Galegote Rock 2016 polos diferentes escenarios previstos, demostrando que a música en galego goza dunha boa saúde en Pontevedra.
Ademais, o festival incluíu varias actividades paralelas, entre elas, a organización de xogos populares para nenos na praza da Pedreira ou contacontos no Pazo de Mugartegui.