Os grupos locais de teatro contan, dende este sábado, cun novo escenario para dar renda solta ao seu inmenso talento. O salón de actos do Sexto Edificio do Museo de Pontevedra acolleu, con grande éxito de público, a primeira obra dun ciclo teatral que se vai desenvolver durante os próximos tres meses. Foi A farsa de Bululú, representada pola compañía Arume Teatro.
A farsa de Bululú é unha obra escrita por Manuel María en plena ditadura. Trátase dunha sátira que fai referencia á situación política durante o franquismo. Toda unha alegación antimilitarista, escrita en clave para evitar a censura da época. Así, tras o Bululú, o Gran Mariscal ou a Raíña Facunda escóndense Franco, Carrero Blanco e outros personaxes destacados do réxime.
Esta farsa, que bebe das fontes satíricas da tradición galego-portuguesa das cantigas de escarnio e maldicir e na que se critica claramente ao exército, tamén ten claras referencias ás obras de Valle-Inclán e de Lorca.
Este ciclo de teatro, que inclúe tres obras das compañías Arume, 105 bicos e Armadiña, é unha proposta das propias asociacións culturais, que solicitaron á Deputación a inclusión desta actividade artística dentro da programación do Museo.
A próxima representación será o próximo 18 de outubro e correrá a cargo de 105 bicos. O ciclo concluirá o 15 de novembro coa obra Saúde Private Hospital, de Armadiña Teatro.