O Día das Letras Galegas conmemorarase no Museo de Pontevedra cun obradoiro e concerto didáctico arredor da tradición oral feminina, protagonista da edición deste ano
Baixo o título 'Por que cantan as mulleres', esta actividade estará conducida por Branca Villares (Lugo, 1980). Bióloga de formación, forma parte do colectivo Eudemónicas e imparte aulas de canto tradicional, pandeira, pandeiro e pandeireta en diferentes escolas municipais e colectivos culturais da provincia de Lugo.
A actividade, organizada pola Deputación Provincial de Pontevedra, está prevista para o venres 16 de maio ás 19 horas no Edificio Castelao.
Está dirixida a persoas de todas as idades e non é necesaria reserva previa.
A actividade trata de debullar por que cantamos, que cantamos e como cantamos as persoas, para entender os contextos onde tivo lugar a creación e transmisión oral das mulleres cantareiras.
Reflexionarase sobre a presenza ou ausencia de mulleres naquilo que consideramos universal no canon cultural.
Farase un percorrido polos distintos xéneros e temáticas das cantigas, pola xeografía de Galicia e as particularidades da súa oralidade.
Ademais de gozar do relato de Branca Villares e das cantigas, as persoas participantes cantarán e dialogarán cos sons e ritmos, nunha experiencia inmersiva e significativa para traballar e entender a oralidade.
Tamén se establecerán conexións do folclore galego con outros de África, Europa ou América.