Con catro novas incorporacións. Así se reforzou este mércores a oferta musical do Atlantic Fest 2026, que se celebrará en Vilagarcía de Arousa os días 17, 18 e 19 de xullo coa Praia da Concha como escenario principal.
Xunto a Carolina Durante, unha das bandas de referencia do indie-rock nacional, sumaranse á próxima edición Depresión Sonora, Triángulo de Amoz Bizarro e Nadadora, estes últimos tras o seu regreso á música quince anos despois.
Todos eles dan forma a un cartel no que, como xa fora anunciado, atopábanse xa as bandas británicas Franz Ferdinand e Two Door Cinema Club e dous músicos nacionais de altura, Nacho Vegas e Carlos Ares.
A organización defendeu ademais a súa aposta por ofrecer un festival diferente porque entenden que "non se trata de encher un cartel, senón de darlle sentido".
"Eliximos artistas que teñan algo que dicir, que estean a vivir un momento especial e que entendan o directo como un verdadeiro lugar de encontro co público. Música que se sente próxima, veña de Glasgow ou veña de Boiro", sinalaron.
Así encaixa, entre outros, Carolina Durante, que chegará no que, probablemente, é o mellor momento da súa carreira tras capturar como ninguén o espírito de toda unha xeración a base de guitarras, actitude, letras afiadas e un directo sen concesións.
Depresión Sonora, pola súa banda, mostrará os temas que adiantan o seu novo disco, no que transforman a incerteza, a emoción e os dilemas contemporáneos en cancións de post-punk cru, irónico e profundamente emocional.
Con respecto a Triángulo de Amor Bizarro, subliña o Atlantic Fest, máis de vinte anos aválanlles como unha das bandas imprescindibles do indie español. Virá con novo disco e un directo imprevisible, eléctrico e absolutamente magnético.
E Nadadora, posiblemente, ofrecerán o concerto máis emotivo, presentando en directo os temas de Mañana y siempre, un traballo que fala de comezos, perdas, memoria e reconstrución, combinando madurez, sensibilidade e unha intensidade intacta.
Os abonos para o Atlantic Fest 2026 están á venda ao prezo de 75 euros até o próximo 2 de marzo, momento no que aumentará a súa contía.