A primeira intervención que, máis aló de escavacións puntuais, está a realizarse no castro de Punta Cantodorxo, no Grove, revelou que este enclave estivo ocupado, polo menos, até o século I.
A investigación, promovida polo Concello do Grove e o grupo de Estudos de Arqueoloxía, Antigüedad e Territorio (GEAAT) da Universidade de Vigo, está deseñada para constatar a existencia de restos que permitan datar o xacemento.
Os traballos están a centrarse nunha zona na que "desde antigo se coñece que hai restos arqueolóxicos", sinalou a directora da intervención, Alba Rodríguez.
"Até agora fixéronse escavacións puntuais limpando perfís de terra, nas que se recuperou material arqueolóxico e restos animais", explicou a investigadora.
Xa entón se atoparan diferentes materiais cerámicos da Idade do Ferro.
A intervención que se desenvolve agora permitiu confirmar a existencia de restos do castro a través de cinco "sondaxes valorativas" realizadas nunha serie de lugares nos que se escavou un espazo de dous por dous metros.
O obxectivo destas catas, segundo Rodríguez, era "delimitar un pouco o xacemento e entender como era".
Estas primeiras sondaxes completáronse con resultados positivos, ao detectarse restos de casas e materiais arqueolóxicos, entre eles cerámicas comúns ou ánforas e diverso material que o equipo investigador data na época romana.
A esta intervención en Cantodorxo sumaranse ademais nas próximas semanas novos traballos do grupo GEAAT no xacemento de Adro Vello, situado tamén no Grove.
Neste caso, trátase dun enclave no que ao longo dos últimos catro anos desenvolvéronse unha serie de escavacións, financiadas pola Xunta de Galicia, que permitiron reconstruír os dezaoito séculos de ocupación deste espazo.
