O festival galego Curtas Festival do Imaxinario sumou esta fin de semana un novo recoñecemento internacional ao ser distinguido co Premio Especial na 46ª edición do histórico certame portugués Fantasporto. A entrega produciuse na noite do sábado 7 de marzo, durante a gala de clausura celebrada na cidade de Porto.
O galardón foi entregado persoalmente polo director de Fantasporto, Mario Dorminsky, quen destacou durante a súa intervención a longa e estreita relación que une ao festival luso con Galicia. Dorminsky fixo tamén unha mención especial ao director do certame vilagarcián, Luis M. Rosales, subliñando os anos de colaboración e complicidade profesional que contribuíron a fortalecer os lazos entre ambos os dous eventos.
A presenza do festival galego nesta edición de Fantasporto tivo como eixo central a presentación do proxecto "Galicia Imaxinaria", unha iniciativa pensada para situar a creatividade e a forza visual dos autores galegos no escaparate internacional do cine fantástico. O proxecto serviu como carta de presentación do talento audiovisual galego ante programadores, críticos e profesionais do sector presentes no festival portugués.
Esta colaboración terá continuidade na próxima edición do Curtas en Vilagarcía de Arousa. O acordo prevé a organización dunha mostra retrospectiva de curtametraxes de xénero seleccionadas polo propio Fantasporto, reforzando así o diálogo cultural entre ambos certames e ampliando as oportunidades de difusión para o audiovisual europeo.
Co Premio Especial, Fantasporto recoñece non só a calidade da programación do festival vilagarcián, senón tamén a súa capacidade para crear pontes internacionais e o seu compromiso co cine fantástico e de terror.
O Curtas Festival do Imaxinario, fundado en 1973, é o festival audiovisual máis antigo de Galicia e un referente internacional do cine fantástico. Cada outono, Vilagarcía convértese nun punto de encontro de cine, literatura, cómic e artes visuais nunha programación multidisciplinar.
Forma parte da Méliès International Festivals Federation e concede o Méliès d’Argent á mellor curtametraxe fantástica europea. Recentemente recibiu recoñecementos como o EFFE Label 2026‑2027 e foi incluído entre os 90 mellores festivais de xénero do mundo segundo Dread Central.
A próxima edición terá lugar do 23 de outubro ao 1 de novembro de 2026 en Vilagarcía de Arousa, reunindo cineastas, público e profesionais do fantástico.
Engade Pontevedra Viva como fonte preferida de Google de balde
Mantente informado coas últimas noticias de actualidade.