O Café Moderno de Pontevedra será a primeira parada dunha ruta por Galicia da exposición 'Outras historias posibles', que parte do Museo Gaiás, na Cidade da Cultura.
Trátase dunha exposición que reclama para as novas xeracións o talento de seis mulleres que despuntaron a finais do pasado século XX na arte contemporánea feita en Galicia: Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré.
A Consellería de Cultura, Lingua e Xuventude clausura a exposición este domingo 26 tras recibir 56.000 visitas.
Comisariada pola profesora e investigadora da Universidade de Vigo, Susana Cendán, 'Outras historias posibles' continuará a viaxar por centros culturais da xeografía galega sumando espazos nos que celebrar a diversidade do talento.
Esa pluralidade do talento pode verse nas pinturas cosidas con coiro de Tusi Sandoval, nos xogos coa nosa percepción dos óleos e debuxos de Anne Heyvaert, o compromiso social contracorrente de Laura Terré, o explosivo uso da cor de Ana García Pan, o anhelo de plasmar os soños de Blanca Silva e a constante experimentación co material cerámico de Emilia Guimeráns.
Pinturas, esculturas, xilografías e debuxos configuran un percorrido que permite apreciar o devir de cada artista, sen obviar o impacto do contexto social e persoal nos camiños que decidiron tomar e na visibilidade das súas traxectorias.
A maternidade, os roles de xénero, ou mesmo as correntes dominantes no mercado e na crítica artística da época son aspectos que esta mostra integra e fai explícitos, desbotando o mito do ‘xenio-artista’ individual.