Caldas de Reis volverá converterse en escenario do prestixioso Festival Atlántica por segundo ano consecutivo, acollendo dúas funcións de narración oral no emblemático Xardín Botánico.
Este encontro internacional, que une Galicia e Portugal a través dos contos e as historias, fará parada no municipio caldense con dous espectáculos gratuítos para o público.
O primeiro evento terá lugar o mércores 2 de xullo ás 21.00 horas, coa actuación do narrador Simone Negrín, que presentará "Fare le corna".
Trátase dunha proposta para público adulto que combina elementos da tradición oral italiana e galega, nun espectáculo bilingüe (galego e castelán) caracterizado polo seu humor e retranca.
O venres 4 de xullo, ás 11.00 horas, será a quenda do artista aragonés Oswaldo Pai co seu espectáculo "Artiloxios".
Esta función, en castelán, está pensada para público infantil a partir de 8 anos, adolescentes e adultos, e ofrece unha experiencia chea de imaxinación con diversos cachivaches que buscan facer sorrir e reflexionar ao mesmo tempo.
Segundo explicou Manuel Fariña, tenente de alcalde e concelleiro de Cultura, "o Festival Atlántica é unha referencia da cultura viva e comunitaria" e destacou a importancia de converter "espazos naturais e urbanos en escenarios de encontro, palabra e imaxinación".
Fariña tamén subliñou que estas iniciativas "proxectan a imaxe de Caldas de Reis como un concello aberto ao mundo" que, ademais de amosar orgullo pola súa identidade e paisaxe, está "disposto a dialogar con outras culturas desde a palabra".
Os dous espectáculos terán entrada libre e forman parte dunha estratexia municipal na que a narración oral ocupa un lugar destacado como vehículo de expresión e memoria colectiva.