Elegancia, emoción e recordo aos incendios na despedida de Paloma San Basilio dos escenarios

A Praza de España encheuse este venres para unha das citas musicais máis agardadas das Festas da Peregrina, o concerto de Paloma San Basilio. 

A artista visitou Pontevedra dentro da súa xira de despedida dos escenarios, 'Gracias', na que era, ademais, a súa única data en Galicia.

A cantante empezou o show cunha emocionada mención aos incendios que arrasan Galicia estes días, indicando a dor que sente ao ver as chamas ao carón e outro da estrada. 

Quixo dedicar unhas palabras ás persoas que están "a sufrir" a vaga de incendios e perdendo "as súas casas e os seus soños" polo lume.

O espectáculo soubo a despedida, pero tamén a recordos e a moita emoción, pois supuxo un tributo aos 50 anos de carreira desta voz icónica da música española.

A autora de temas inesquecibles como No llores por mi Argentina, Luna de miel ou Juntos fixo gala da súa elegancia habitual.

Sobre o escenario, ao carón da banda que a acompaña, contou coa súa propia filla como corista.

O concerto, de entrada libre, foi unha cita histórica e reuniu na Praza de España a espectadores de todas as idades, varias xeracións xuntas para despedir en vivo a unha das grandes voces da música en español.

A programación musical das Festas da Peregrina continúa este sábado 16 de agosto co Concerto da Orquestra Sinfónica de Pontevedra e Grupo Tradicional Chavellos ás 21.00 horas na Praza da Ferraría

A continuación, ás 22.30 horas, está previsto o concerto de G5, grupo composto por Kiko Veleno, Muchachito, Tomasito, El Canijo de Jeréz e Diego Ratón na Praza de España. 

Ás 22.45 horas, en Montero Ríos haberá unha nova cita coa verbena, da man da orquestra A Fábula.