A parroquia de Viascón celebrou este domingo unha homenaxe dedicada ao gaiteiro Ricardo Portela, unha das figuras máis influentes da gaita contemporánea.
Veciñanza, representantes institucionais, músicos e familiares participaron nun acto cargado de emoción que puxo en valor o legado dun artista considerado mestre de mestres.
A iniciativa reuniu ao Concello de Cerdedo-Cotobade, á Deputación de Pontevedra e á Comunidade de Montes de Viascón, representados polo alcalde e deputado provincial Jorge Cubela e polo presidente veciñal Ernesto Filgueira. Tamén estiveron presentes Gonzalo e Rosa Portela, netos do músico homenaxeado, ademais do escultor Jorge Senra e representantes do ámbito cultural e asociativo ligado á música tradicional.
A xornada comezou coa apertura da exposición "Ricardo Portela, inmorrente" na Casa do Pobo de Viascón, unha mostra impulsada pola Deputación e comisariada polo gaiteiro Óscar Ibáñez.
A exposición percorre a vida e a carreira artística de Portela a través de paneis informativos, instrumentos, fotografías, discos e obxectos persoais. O percorrido permite descubrir tanto a súa traxectoria musical como a profunda conexión que mantivo con Viascón, Vigo e Pontevedra, territorios fundamentais na súa vida.
Un dos momentos máis simbólicos da homenaxe chegou coa inauguración da nova "Praza de Ricardo Portela", situada no exterior da Casa do Pobo. O espazo levará desde agora o nome do gaiteiro, recoñecido como un dos grandes renovadores da música tradicional galega sen perder nunca a esencia dos vellos intérpretes populares.
Durante o acto tamén se descubriu unha escultura en ferro coa silueta dunha gaita, obra de Jorge Senra e doada pola empresa Ingeniería y Montajes Rías Baixas. A peza quere representar o carácter eterno dun instrumento que o propio Portela definía como "inmorrente", unha palabra xa inseparable da súa figura.
Especialmente emotivas foron as palabras de Ernesto Filgueira, que aproveitou a ocasión para anunciar que esta foi a súa última intervención pública como presidente da Comunidade de Montes tras 25 anos de dedicación á entidade.
Pola súa banda, Jorge Cubela destacou a importancia da gaita como símbolo colectivo da identidade galega e reiterou o compromiso institucional coa defensa e difusión das tradicións culturais do país.
Nado en Viascón, Ricardo Portela deixou unha pegada decisiva na interpretación da gaita galega. O seu estilo persoal, recoñecible e cheo de matices, segue vivo no repertorio e na forma de tocar de numerosos músicos actuais. Ademais da súa capacidade interpretativa, o gaiteiro destacou pola súa sensibilidade artística e pola defensa da transmisión da cultura popular ás novas xeracións.
A homenaxe pechouse coa actuación dos grupos de gaitas Boa Vila e Canón de Pau, que puxeron a banda sonora final a unha xornada marcada pola emoción e polo recoñecemento a unha figura esencial da música galega.
A exposición "Ricardo Portela, inmorrente" poderá visitarse ata o 31 de maio os mércores e venres entre as 19.00 e as 21.00 horas, así como os domingos de 11.00 a 14.00 horas.