O festival máis lonxevo do panorama audiovisual galego prepárase para unha nova fazaña fóra das súas fronteiras porque o Curtas Festival do Imaxinario de Vilagarcía de Arousa viaxará a vindeira semana á 79ª edición do Festival de Cannes. Alí está previsto que se integre no prestixioso Marché du Film.
Esta incursión na cita francesa, que se desenvolverá do 12 ao 23 de maio, supón un movemento estratéxico para a difusión internacional tanto do certame como da propia vila arousá.
A representación galega terá o seu espazo dentro do Fantastic Pavilion, un punto de encontro especializado na comunidade do cinema de xénero.
Neste ámbito profesional, a identidade visual do festival, incluído o seu logotipo e o trofeo oficial, contará cunha visibilidade destacada, situando a marca de Vilagarcía nos principais foros de decisión do cinema de terror, a fantasía e a ciencia ficción a escala mundial.
O equipo técnico do Curtas desprazado á Costa Azul desenvolverá unha axenda centrada no scouting cinematográfico.
A idea principal é establecer vínculos directos con produtoras, distribuidoras e programadores globais para seleccionar as pezas máis innovadoras da tempada e garantir a súa exhibición en Galicia o vindeiro outono.
Máis alá da vertente estritamente profesional, o festival exercerá como ferramenta de promoción turística e cultural.
A presenza en Cannes permitirá presentar a Vilagarcía de Arousa como un destino de referencia ante a prensa especializada e as institucións internacionais, aproveitando a rede de contactos que ofrece o mercado audiovisual máis importante do mundo.
Esta expedición a Cannes chega nun momento no que o festival arousá goza dunha proxección exterior sen precedentes.
Como membro oficial da Méliès International Festivals Federation (MIFF), o Curtas é o encargado de outorgar o galardón Méliès d’Argent á mellor curtametraxe fantástica europea.
A esta distinción súmanse outros méritos recentes, como a obtención da EFFE Label 2026-2027, un selo de calidade concedido pola Asociación Europea de Festivais co respaldo da Comisión Europea.
Ademais, o festival figura na prestixiosa selección internacional de Dread Central, que o sitúa entre os 90 mellores eventos de xénero do planeta.
O Curtas Festival do Imaxinario, que iniciou o seu camiño en 1973, transformouse co paso das décadas nunha proposta multidisciplinar que abrangue o cinema, o cómic e a literatura.
A súa próxima cita co público galego, a 54ª edición, terá lugar do 23 de outubro ao 1 de novembro.
Engade Pontevedra Viva como fonte preferida de Google de balde
Mantente informado coas últimas noticias de actualidade.