Falece o creador multidisciplinar pontevedrés Carlos Taboada, aos 45 anos

Dor e estupor en Pontevedra pola morte repentina de Carlos Taboada (Pontevedra, 1979-2025), ilustrador e escritor pontevedrés e unha das dúas patas do colectivo creativo 'Polo Correo do Vento'.

Taboada faleceu aos 45 anos este mércores 13 de agosto en Pontevedra, deixando un fillo e un gran baleiro no mundo da cultura e a educación da Boa Vila e de Galicia.

Creador multidisciplinar, destacou polo seu compromiso nos ámbitos da educación, a cultura e a lingua galega, enfocado ao público infantil.

Desde 'Polo Correo do Vento' e tamén desde o seu selo editorial Lela Edicións, creado xunto á súa parella, Joanna Lorenzo, ocupou un oco na literatura infantil pontevedresa, gañando gran popularidade na comunidade escolar e as familias.

O seu salto á palestra deuse no ano 2008. Tras estudar Publicidade e Relacións Públicas, este ano fundou, con Enrique Mauricio, 'Polo Correo do Vento', que nos últimos 17 anos non parou de realizar publicacións e actividades divulgativas na área da literatura infantil, a animación á lectura, a ilustración e a creación audiovisual.

Ademais, publicou dous títulos en solitario, como escritor e ilustrador, coa editorial Xerais, ambos os finalistas do Premio Merlín de Literatura Infantil. En 2018, publicou A biblioteca de Pedrarcana e este mesmo 2025, O caderno de Roque.

Con 'Polo Correo do Vento', con converteu, xunto con Mauricio, nun habitual de colexios e bibliotecas de toda Galicia, e labrouse o agarimo, o respecto e a admiración da comunidade escolar de toda Pontevedra.

Ademais de realizar narracións e ilustracións en directo e de presentar os seus libros polos centros escolares, desenvolveron o proxecto educativo 'O teu cole na historia', que creou murais xerados en diversos espazos de Pontevedra, ilustrando as súas historias e tradicións.

Na súa faceta de editor con Lela Edicións, publicou, xunto con Joanna Lorenzo, catro coleccións especializadas no público infantil. Con 'Mulleres galegas', realizarno nove biografías de mulleres destacadas, e tamén editaron BD e as coleccións 'Rañolas' e 'Homenaxes'.

Tamén era moi coñecido no ámbito deportivo pola súa vinculación ao balonmán pontevedrés.