'Guerra' abre o ciclo Ponteatro cunha reflexión escénica sobre os conflitos europeos

O Teatro Principal volveu converterse este xoves en escenario de reflexión e memoria coa representación de 'Guerra', a última montaxe da compañía Teatro do Noroeste, que inaugurou unha nova edición do ciclo Ponteatro.

A proposta sitúa ao espectador no interior dun teatro devastado por un bombardeo nunha contenda que estala no corazón de Europa. Entre os cascallos dese edificio arrasado emerxen figuras emblemáticas do teatro universal, personaxes que foron representados alí ao longo do tempo e que regresan agora encarnados por un elenco formado por dous actores e catro actrices.

Sobre as táboas sucédense evocacións dos grandes conflitos que atravesaron a dramaturxia europea, desde Shakespeare até Lorca, nunha posta en escena que combina o ton tráxico con apuntamentos de ironía e humor, ao estilo shakespeariano, para aliviar a dureza do relato.

A montaxe leva a firma de Eduardo Alonso, responsable do texto e da dirección. O elenco está integrado por Luma Gómez, Miguel Pernas, Manuela Varela, Maxo Barjas, Sabela Hermida e Xavier Estévez. A dirección musical corre a cargo de Bernardo Martínez, mentres que a escenografía e o vestiario son obra de Carlos Alonso. A produción está coordinada por Eva Alonso.

Fundada en 1987, Teatro do Noroeste é unha das compañías de referencia no panorama escénico galego. Cunha traxectoria consolidada e unha firme aposta pola lingua galega en todos os seus espectáculos, produciu e distribuíu numerosas montaxes ao longo de case catro décadas. O seu traballo foi recoñecido con galardóns como os Premios María Casares, os do Festival de Teatro Galego e os Premios Max, estes últimos concedidos a textos de Eduardo Alonso.

Con esta función do 26 de febreiro, a compañía deu o pistoletazo de saída á programación de Ponteatro, que volverá situar a Pontevedra como punto de encontro para as artes escénicas.