Pontevedra celebrou onte, xoves 18 de decembro, un acto colectivo de lectura pública adicado á obra de Castelao.
Baixo o título "Lermos Castelao", a iniciativa tiña lugar ás 19:30 horas no emblemático Café Moderno da cidade, lugar onde o intelectual galeguista mantiña tertulias con outras personalidades do século XX.
O evento conto coa asistencia do alcalde de Pontevedra, Miguel Anxo Fernández Lores.
Organizado pola Asociación Cultural Maio Longo e Vía Galega, o evento tivo como obxectivo principal divulgar de maneira directa e accesible os textos fundamentais do intelectual galego.
A través dunha escolma coidadosamente seleccionada, os participantes realizaron un percorrido cronolóxico e temático pola traxectoria de Castelao, abordando os distintos xéneros literarios que cultivou ao longo da súa vida, como o relato breve, a novela, o ensaio, o epistolario ou o teatro.
"Lermos Castelao" enmárcase na programación especial do Ano Castelao, desenvolvida en colaboración co Concello de Pontevedra.
Con este acto realizábase unha nova homenaxe á figura e obra dun dos referentes políticos e culturais máis importantes da Galicia contemporánea, consolidando a súa relevancia no panorama cultural actual.